გზისპირა სავაჭრო სივრცე ბადიაურშიბადიაური, საქართველო2026

წარმოგიდგენთ საგარეჯოს მუნიციპალიტეტში, სოფელ ბადიაურის მიმდებარედ, ადგილობრივი კვების პროდუქტების რეალიზაციისთვის განკუთვნილი სავაჭრო სივრცის არქიტექტურულ კონცეფციას. ისტორიულად ეს მარშრუტი კახეთის აქტიური სავაჭრო არტერია იყო, ხოლო გზისპირა ვაჭრობა — შოთის პური, ყველი, ტრადიციული ტკბილეული — რეგიონის გასტრონომიულ სავიზიტო ბარათად იქცა. პროექტის არსი ამ ტრადიციის გადარჩენა და თანამედროვე, უსაფრთხო სივრცეში ტრანსფორმირებაა.

საპროექტო ტერიტორია 9241 მ² ფართობის სამკუთხა ნაკვეთია, რომელიც ერთი მხრიდან მშენებარე თბილისი–ბაკურციხე–ლაგოდეხის ჩქაროსნულ მაგისტრალს ესაზღვრება, მეორე მხრიდან კი სოფლის დასახლებას. კომპლექსი ბუფერის როლს ასრულებს: იცავს საცხოვრებელ ზონას მაგისტრალისგან და ქმნის ღია საზოგადოებრივ სივრცეს. ვიზიტორთა პარკინგი ნაკვეთის ფართო, დასავლეთ ნაწილშია, ხოლო პერსონალის პარკინგი და ლოგისტიკური ნაგებობა — ვიწრო, აღმოსავლეთ ნაწილში.

არქიტექტურის მთავარი ელემენტი მასშტაბური, ზიგზაგისებრი ერთიანი გადახურვაა, რომელიც კახეთის ვენახების რიგებსა და ტრადიციული სასოფლო-სამეურნეო ნაგებობების პროფილს ეხმაურება. მოდულებს შორის განიერი ხეივნები დომინანტური ქარების (ჩრდილო-დასავლეთი – სამხრეთ-აღმოსავლეთი) ღერძზეა ორიენტირებული, რაც ბუნებრივ ვენტილაციას და კომფორტულ მიკროკლიმატს ქმნის.

კომპლექსი 200-მდე სავაჭრო ობიექტზეა გათვლილი და აერთიანებს ჯიხურებს თონით, მცირე სავაჭრო მოდულებს, სეზონური დახლების ზონას, საწყობებს, სანიტარულ კვანძებს და ღია ტერასებს მაგიდებით. მოქნილი პლატფორმა საწყის ეტაპზე რეგიონში არსებულ 55-მდე მეწარმეს მოემსახურება და ეტაპობრივად, დამატებითი ჩარევის გარეშე, სრულ მასშტაბს აითვისებს.

თეთრად შეღებილი ფოლადის კარკასი მსუბუქ ჩონჩხს ქმნის, პავილიონები ტერაკოტისფერი ლითონის პანელებითაა მოპირკეთებული, დახლები — ბუნებრივი ხით, ხოლო აგურისფერი ფილები „ნაძვისებრი“ წყობით კახურ თიხასა და ნიადაგს ეხმაურება. არსებული ხე-ნარგავები შენარჩუნებულია ატრიუმებსა და სარეკრეაციო სივრცეებში, მთელი კომპლექსი კი უბარიერო და ინკლუზიურია.

გზისპირა სავაჭრო სივრცის (ბაზრობის) საკონკურსო პროექტი ბადიაურში, კახეთი — საზოგადოებრივი და კომერციული სივრცე გზის პირას. ავტორი: არქიტექტურული ბიურო ISYNC.