ქრისტო და ჟან-კლოდის ცენტრი გაბროვოშიგაბროვო, ბულგარეთი2026

წარმოგიდგენთ ჩვენს საკონკურსო პროექტს ბულგარეთში, გაბროვოში, ქრისტო და ჟან-კლოდის სახელობის თანამედროვე ხელოვნების ახალი ცენტრის საერთაშორისო არქიტექტურული კონკურსისთვის. პროექტი ყოფილ საფეიქრო ტექნიკუმს – ქალაქის ისტორიის ღირსშესანიშნაობას, რომელიც გაბროვოს ერთ-ერთი ყველაზე ცნობილი შვილის, მხატვარ ქრისტოს ბიოგრაფიასაც უკავშირდება – „ხელოვნების ქსოვილად“ აქცევს: სივრცედ, რომელიც მხატვრების თამამ სულისკვეთებას აცოცხლებს და ექსპერიმენტისკენ, კვლევისა და ურთიერთგაცვლისკენ იწვევს.

ადგილის ღერძებითა და ნაკადებით ნაკარნახევი მსუბუქი, გამჭვირვალე მოცულობები – პოლიკარბონატის, მინისა და ბადისგან – ყოფილი სკოლის გრძელ, მასიურ კორპუსებს შორის ჩაეწყობა. ისინი ერთდროულად შესასვლელი, კომუნიკაცია, ფასადი და საზოგადოებრივი სივრცეა: თხელი, „დასახლებული“ გარსი, რომლის კიბეები, ბაქნები და ტერასები ფასადებს სინათლითა და ცხოვრებით ავსებს და ჩაკეტილ ინსტიტუციურ შენობას ღია, ექსპრესიულ და ცოცხალ არქიტექტურად გარდაქმნის.

პირველ დონეზე შენობა და ლანდშაფტი ქალაქისა და მდინარისკენ იხსნება. არსებული ხიდის მოხსნა ორ ეზოს ერთმანეთს აკავშირებს, ახალი კუთხის შესასვლელი და გამჭვირვალე შესასვლელი მოცულობა ერთიან მისასვლელ სივრცეს ქმნის, ხოლო პირველი სართული – დღეს ეზოდან დაახლოებით 1,15 მეტრით აწეული – საფეხურების გარეშე, ყველასთვის ხელმისაწვდომი ხდება. მინის საკომუნიკაციო ღერძი ცენტრალური ლიფტებით შენობაში უწყვეტ პრომენადს აყალიბებს.

შიგნით მუდმივი კოლექციისა და მოქნილი დროებითი გამოფენების გალერეები, მხატვრების სტუდიები და საერთო სახელოსნოები, მოწვეული ხელოვანების რეზიდენცია, ღონისძიებების დარბაზები, ახალგაზრდული სივრცე, ადმინისტრაცია, კოვორკინგი და პანორამული ტერასის მქონე რესტორანი ბოლო სართულზე დამოუკიდებლად ფუნქციონირებს, თუმცა საერთო მარშრუტებით, ხედებითა და შეხვედრის ადგილებით ერთიანდება.

პროექტის პრინციპია „მეტი – ნაკლები ჩარევით“: 1970-იანი წლების შენობას მემკვიდრეობის ძეგლის პატივისცემით ვეპყრობით – ვაღდგენთ, ვაუმჯობესებთ და ახალ ღირსებას ვანიჭებთ. მინიმალური დემონტაჟი, ფრთხილი ადაპტაცია, ზუსტი მსუბუქი დამატებები და ყველაფრის ხელახალი გამოყენება, რაც ჯერ კიდევ ვარგისია, ცენტრს საშუალებას აძლევს ეტაპობრივად განვითარდეს ისე, რომ მისი მხატვრული ცხოვრება არ შეწყდეს.

პროექტი შექმნილია კოლაბორაციით: დიზაინის ლიდერი — Studio Georgi Belyanov, ინჟინერია — Transsolar, ლანდშაფტი — Openfabric, ISYNC-თან ერთად.

ქრისტო და ჟან-კლოდის ცენტრის საკონკურსო პროექტი ქალაქ გაბროვოში, ბულგარეთი — არსებული შენობის კულტურული ადაპტაცია. ავტორი: არქიტექტურული ბიურო ISYNC, საქართველო.